Awareness Campaign

ଭାରତୀୟ ମାନବ ଅଧିକାର ପରିଷଦ ତରଫରୁ ନଗଡା ଅଞ୍ଚଳ ଗ୍ରସ୍ତ ।।

BHRC 2024-05-18 22:51:16

ଭାରତୀୟ ମାନବ ଅଧିକାର ପରିଷଦ ତରଫରୁ ନଗଡା ଅଞ୍ଚଳ ଗ୍ରସ୍ତ ।।

ଦିନଥିଲା ନଗଡା ବିଶ୍ୱରେ ଅପପୃଷ୍ଟି ଜନିତ ଶିଶୁମୃତ୍ୟୁ ଘଟଣା ପାଇଁ ବିଖ୍ୟାତ ଥିଲା । ସେଠାରେ ନଥିଲା ରାସ୍ତା କି ଶିକ୍ଷା, ସ୍ବାସ୍ଥ୍ୟ, ରୋଜଗାର ଆଦିର ବ୍ୟବସ୍ଥା । ଅଞ୍ଚଳକୁ ନେତା, ମନ୍ତ୍ରୀ କି ପ୍ରଶାସନ କାହାରି ବି ପାଦ ପଡୁ ନଥିଲା । ଏପରିକି ଯାଜପୁର ଜିଲ୍ଲା ଭୁଗୋଳ ରୁ ନଗଡା ବିଷୟରେ କାହାକୁ ଜଣା ନଥିଲା । କିନ୍ତୁ ସେହି ଅସୁବିଧା ସବୁ ଦୂର ହୋଇ ଏବେ ତାହା ଇତିହାସ ପାଲଟିଲାଣି । ଘଟଣା ପରେ ଦୀର୍ଘ ବର୍ଷ ଧରି ନଗଡା ର ଚିତ୍ର ବଦଳେଇବା ପାଇଁ ରାଜ୍ୟ ସରକାର ଲାଗି ପଡ଼ିଥିବା ବେଳେ ଏହା କେତେ ଦୂର ସଫଳ ହୋଇଛି ଜାଣିବା ଲକ୍ଷରେ ପହଞ୍ଚିଥିଲେ ଭାରତୀୟ ମାନବ ଅଧିକାର ପରିଷଦ ର ଏକ ପ୍ରତିନିଧି ଦଳ । ପରିଷଦର ରାଷ୍ଟ୍ରୀୟ ଅଧ୍ୟକ୍ଷ ଡକ୍ଟର ପୂର୍ଣ୍ଣଚନ୍ଦ୍ର ସାହୁ ଙ୍କ ନେତୃତ୍ୱରେ ଏକ ପାଞ୍ଚ ଜଣିଆ ଟିମ୍ ୨୯ ତାରିଖ ଶୁକ୍ରବାର ଦିନ ୧୦ ଘଟିକାରୁ ଅପରାହ୍ନ ୪ ଘଟିକା ପର୍ଯ୍ୟନ୍ତ ତଳ ନଗଡା, ମଝି ନଗଡା ଓ ଉପର ନଗଡା ବୁଲି ଦେଖିଥିଲେ । ନଜରକୁ ଆସିଲା ଯେ, ଖଣି ପ୍ରଭାବିତ ଅଞ୍ଚଳ ହୋଇଥିବାରୁ ଏବେ ବି ଶିକ୍ଷା, ସ୍ବାସ୍ଥ୍ୟ, ରୋଜଗାର ଆଉ ନିୟୋଜନ କ୍ଷେତ୍ରରେ ବହୁ ପଛରେ ଅଛନ୍ତି ଏହି ଗ୍ରାମବାସୀ । ପ୍ରତିଦିନ ମୂଲ୍ୟବାନ ଖଣିଜ ସମ୍ପଦ ଲୁଟି ନେଉଥିବା ଟାଟା, ଇମ୍ଫା, ଜିନ୍ଦଲ, ବାଲେଶ୍ଵର ଆଲଓଜ, ଫେକର, ବେଦାନ୍ତ ଆଦି କମ୍ପାନୀ କେବଳ ଉପର ଚିକ୍କଣ ଦେଖାଯିବା ଭଳି କାର୍ଯ୍ୟ କରୁଛନ୍ତି । ନିରୀହ, ଅପାଠୁଆ ଅଧିବାସୀଙ୍କ ପାଇଁ ଉନ୍ନତିମୂଳକ କାର୍ଯ୍ୟ ପ୍ରାୟ ଶୂନ୍ୟ । ଏପରିକି ଓ.ଏମ୍.ସି. ଏହି ଖଣି ଅଞ୍ଚଳର ସିଂହଭାଗ ନେଇ ୧୬ ଗୋଟି ଖଣିରୁ ଉତ୍ତୋଳନ କରି ଚାଲିଥିଲେ ମଧ୍ୟ ଅଞ୍ଚଳର ଉନ୍ନତି ତଥା ପ୍ରାଥମିକ ଅଧିକାର ଓ ସୁରକ୍ଷା ବାବଦରେ ଧ୍ୟାନ ଦେଉ ନଥିବା ଦେଖିବାକୁ ମିଳୁଛି ।
ପରିଷଦର ରାଷ୍ଟ୍ରୀୟ କାର୍ଯ୍ୟକାରୀ ନିର୍ଦ୍ଦେଶକ ଡକ୍ଟର ସଂଗ୍ରାମ କେଶରୀ ପାତ୍ର ସେଠାରେ ଲୋକସମ୍ପର୍କ ଦାୟିତ୍ଵ ନିଭେଇ ସ୍ଥାନୀୟ ବାସୀନ୍ଦା ଙ୍କ ସହ ଆଲୋଚନା କରିଥିଲେ । ପରିଷଦର ରାଜ୍ୟ ମହିଳା ମୋର୍ଚ୍ଚା ସମ୍ପାଦିକା ଶ୍ରୀମତୀ ପୁଷ୍ପାଞ୍ଜଳି ରଣା ଓ କେନ୍ଦୁଝର ଜିଲ୍ଲା ମହିଳା ମୋର୍ଚ୍ଚା କାର୍ଯ୍ୟକାରୀ ସଭାନେତ୍ରୀ ଶ୍ରୀମତୀ ପଦ୍ମିନୀ ସା ମହିଳା ତଥା ଶିଶୁ ମାନଙ୍କ ସହ ମିଳାମିଶା କରି ସେମାନଙ୍କର ସୁବିଧା ଅସୁବିଧା ଉପରେ ଆଲୋଚନା କରିଥିଲେ । ପରିଷଦ ପକ୍ଷରୁ ସ୍ଥାନୀୟ ବାସିନ୍ଦା ଙ୍କୁ କିଛି ଶୁଖିଲା ଖାଦ୍ୟ, ବସ୍ତ୍ର ଏବଂ କମ୍ବଳ ବଣ୍ଟନ କରିବାରେ ପରିଷଦର ଜିଲ୍ଲାର ଅନ୍ୟ ସଦସ୍ୟମାନେ ସହଯୋଗ କରିଥିଲେ । ଶେଷରେ ରାଜ୍ୟ ଶିକ୍ଷା, ସ୍ବାସ୍ଥ୍ୟ ତଥା ଖଣି ଓ ଇସ୍ପାତ ମନ୍ତ୍ରୀ ସମସ୍ତଙ୍କୁ ଅବଗତ କରାଇ ଭାରତୀୟ ମାନବ ଅଧିକାର ପରିଷଦ ପକ୍ଷରୁ ଏକ ନିବେଦନ ଯେ, ସରକାର ଏହି ଅଞ୍ଚଳରେ ନିଜର ଦୃଷ୍ଟି ପକେଇ ଯଥାଶୀଘ୍ର ଅସୁବିଧା ଦୂର କରନ୍ତୁ । ଦୃଷ୍ଟି ଆକର୍ଷଣ ପରେ କେବେ ଏହି ଅଞ୍ଚଳବାସୀଙ୍କ ଦୁଃଖ ଦୁରହେବ ତାହା ଆଗକୁ ଦେଖିବାକୁ ବାକି ରହିଲା !